Kuptimi i jetës 

(Tregim i shkurtër por motivues)

Profesori i filozofisë, pa thënë asnjë fjalë, merr një vazo të madhe bosh dhe vazhdon duke e mbushur atë me topa golfi. Më pas pyet studentët se a është vazoja plot. Studentët janë dakord dhe thonë se po.

Atëherë profesori merr një kuti me toptha qelqi (rruza të vogla) dhe i hedh brenda vazos. Topthat e qelqit mbushin hapësirat boshe nga topat e golfit. Më pas profesori i pyet sërish studentët nëse vazo ishte plot dhe ata përgjigjen se po.

Profesori merr një kuti me rërë dhe e hedh brenda vazos. Pa dyshim rëra mbush hapësirat boshe dhe profesori pyet nëse vazo është plot. Këtë herë studentët përgjigjen njëzëri PO.

Profesori, me shpejtësi, i hedh një filxhan kafe vazos dhe padyshim që mbushen hapësirat e lëna bosh nga rëra. Studentët nisin të qeshin nga ky rast…

Kur e qeshura mbaron profesori thotë: -“Dua të kuptoni se kjo vazo përfaqëson jetën; topat e golfit janë gjërat e rëndësishme si familja, fëmijët, shëndeti, miqtë, dashuria-gjërat që na pëlqejnë. Janë gjëra që, edhe sikur të humbnisim gjithçka dhe të na mbesnin vetëm ato, jetët tona do të ishin ende plot.

Topthat e qelqit janë gjërat e tjera që na interesojnë, si: puna, shtëpia, makina, etj.

Rëra është gjithçka tjetër: gjërat e vogla. Nëse para së gjithash do të vendosnim rërë në vazo, nuk do të kishte vend as për topat e golfit as të qelqit. E njëjta gjë ndodh me jetën. Nëse harxhojmë gjithë kohën dhe energjitë tona për gjërat e vogla, nuk do të kemi më hapësirë për gjërat vërtet të rëndësishme.

Bëj kujdes me gjërat që janë thelbësore për jetën tënde: luaj me fëmijët e tu, gjej kohë për të shkuar tek mjeku, dil për darkë me partnerin/partneren tënd/e, praktiko sportin tënd të preferuar. Do të ketë gjithmonë kohe për të pastruar shtëpinë, për të prerë barin, për të rregulluar gjërat e vogla… Merru më parë me topat e golfit, me gjërat që vërtet kanë rëndësi. Vendos prioritetet e tua: diferenca është vetëm rërë…

Një nga studentet ngre dorën dhe pyet se çfarë përfaqëson kafeja. Profesori buzëqesh dhe thotë: “Jam i lumtur që më bën këtë pyetje. Është vetëm për të treguar se nuk ka rëndësi se sa e zënë është jeta juaj, ka gjithmonë vend për një kafe me miqtë e tu!”

Kur gjërat e rëndësishme të jetës të shkasin nga duart, kur ndihesh i stresuar, kur 24 orë ne ditë duket se nuk të mjaftojnë më, kujtohu dhe reflekto mbi historinë e vazos…

—-

Përshtati: Blerim Emini/FamiljadheShëndeti

 

Shpërndaje
  • 16
  •  
  •  
    16
    Shares